Чÿк уйăхĕн 22-мĕшĕнче Чăваш Республикин вĕренÿ институчĕ И.Я. Яковлев çуралнăранпа 170 çул çитнине халалласа республика шайĕнче «Реклама тĕнчи» конкурс ирттерчĕ. Çак конкурса Тăрмăшри пĕтĕмĕшле пĕлÿ паракан вăтам шкултан 4 ача хутшăнчĕ.

Вика Симушкина (10-мĕш клас) «Чи лайăх буклет» номинацире «Сывлăх – чи хаклă пурлăх» буклетпа 1-мĕш вырăн йышăнчĕ. Хăйĕн рекламине компьютерпа презентаци туса пуянлатнă. Михаил Капитонов (11-мĕш клас) «Уяв техĕмĕ» конкурсĕнче жюри умĕнче килте хатĕрленĕ питех те илемлĕ те тутлă торт сĕннĕ. Комисси ку рекламăна та пысăк хак парса çĕнтерÿçĕ ята панă. Диана Иванова та (8 клас) 1-мĕш вырăна хăпарчĕ. Вăл «Ăшă та çемçе» номинацире урана тăхăнмалли сурăх çăмĕнчен йăваласа тунă тата илемлĕ тĕрĕсемпе капăрлатнă тапочкинесене тăратнă, ăна питех те меллĕ сĕнме пĕлнĕ. Хĕрача талантне кура ăна та çĕнтерÿçĕ ята панă. Вика Кадикина (10 клас) 3-мĕш вырăн йышăнма пултарчĕ. Вăл «Эпир – сывă пурнăçшăн!» плакат тăратнă. Ачасем  хăйсен рекламисене пĕтĕмпех чăваш чĕлхипе ирттернĕ. Ку та пысăк паха.

Питех те маттур ачасем! Çĕнĕ пурнăçпа пĕр тан утса пыраççĕ. Ку утăмсене тума вĕсене чăваш чĕлхине вĕрентекен Григорьева З.Н. пулăшать.